«Կոշիկ լիզելու» նուրբ արվեստը
- 24timeam
- Sep 25, 2024
- 1 min read
ՄԱԿ-ի Գլխավոր վեհաժողովի 79-րդ նստաշրջանի շրջանակում տեղի է ունեցել Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը:
Ըստ պաշտոնական տեղեկատվության՝ ընդգծվել է կարգավորման գործընթացն առանց նախապայմանների շարունակելու և հարաբերություններին նոր ազդակ հաղորդելու պատրաստակամությունը: Քննարկվել են ՀՀ-Ադրբեջան հարաբերությունները և տարածաշրջանային հարցեր:
Այս տեղեկատվությունն այնպիսի համատեքստ է ստեղծում, թե իբրև Նյու Յորքում հայ-թուրքական հարաբերություններում արձանագրվել է առաջընթաց:
Իրականում, տպավորությունը խաբուսիկ է ու դա բացահայտվեց ընդամենը ժամեր անց, երբ Էրդողանը ելույթ ունեցավ ՄԱԿ Գլխավոր ասամբլեայի նիստում:
«Ադրբեջանի և Հայաստանի միջև խաղաղության գործընթացում առաջընթացը կարտացոլվի նաև հայ-թուրքական հարաբերությունների վրա», - հայտարարել է Թուրքիայի նախագահ Ռեջեփ Էրդողանը։
Օբյեկտիվորեն հայ-թուրքական և հայ-ադրբեջանական հարաբերությունները փոխկապակցված են ու այդ համատեքստում առնվազն տարակուսելի է խոսել կարգավորման գործընթացն առանց նախապայմանների շարունակելու մասին:
Ի դեպ, Էրդողանը Նիկոլ Փաշինյանին է նվիրել իր հեղինակած «Ավելի արդար աշխարհը հնարավոր է» գիրքը։ Լուսանկարում Նիկոլ Փաշինյանը գիրքը սեղմել է կրծքին և լայն ժպտում է, ինչն էլ առաջացրել է համացանցի հեգնանքն ու զայրույթը:
Նախկինների դիվանագիտական ջանքերը Փաշինյանը համարում էր օտարների «կոշիկ լիզել»:
Թերևս, արտահայտվենք նույն բառապաշարով ու արձանագրենք, թե երեկ ով էր լիզում Էրդողանի կոշիկները:
Վահրամ Բագրատյան