Հայաստանն ընկել է ծուղակը և Ադրբեջանի հետ որևէ համաձայնեցված սահման չի ունենալու. ընդդիմադիր
- Elen Hovsepyan
- Oct 25, 2024
- 1 min read
Սահմանային անվտանգության հանձնաժողովների աշխատանքի կանոնակարգի հաստատումից հետո Հայաստանը Ադրբեջանի հետ համաձայնեցված սահման չի ունենա։ Պարզապես սահմանը համաձայնեցնելու շուրջ գործընթաց է լինելու: Այս մասին հոկտեմբերի 25-ին Ազգային ժողովում ավանդական ճեպազրույցների ժամանակ հայտարարեց ընդդիմադիր «Հայաստան» դաշինքի պատգամավոր Արմեն Ռուստամյանը։
Նրա խոսքով, հնարավոր է, որ ընդհանուր սահմանի մասին պատկերացման բացակայությունը, ի վերջո, հանգեցնի Հայաստանի կողմից տարածքային զիջումների։
«Կանոնակարգում հստակ նշված է՝ առավելագույնը, որ կարելի է ակնկալել հանձնաժողովների աշխատանքից, սահմանազատման քարտեզ ստեղծելու ուղեցույցն է»,- ասաց Ռուստամյանը։
Նա նշեց, որ Ադրբեջանում այս կանոնակարգը չի անցել խորհրդարան՝ ի տարբերություն Հայաստանի։
Պատգամավորը մտավախություն ունի, որ այն ամենը, ինչ համաձայնեցված է այս դրույթում, խաղաղության պայմանագրի ստորագրումից հետո կարող է պարզապես անվավեր դառնալ։ Ռուստամյանի խոսքով՝ հայկական կողմը հերթական ծուղակն է ընկել։
«Մեթոդական առումով մենք այլ թակարդի մեջ ենք ընկել։ Նման դեպքերում նախ պետք է պատկերացում ունենալ, թե ինչպիսին պետք է լինի սահմանը, և միայն դրանից հետո սկսես ճշտել այս կամ այն հատվածը: Մենք հիմա ճշտում ենք, հետո պարզվում է, որ նշված հատվածները միացնելիս ուրվագծված սահմանը խախտում է մեր տարածքային ամբողջականությունը»,- նշեց պատգամավորը։
Ընդդիմադիրը իշխանության ներկայացուցիչներից հետաքրքրվեց, թե որտե՞ղ կա երաշխիք, որ նոր սահմանը կնշանակի իրենց հայտարարած 29743 ք կմ տարածքը։ «Սա ամենամեծ խնդիրն է, որին կբախվի Հայաստանը ապագայում»,- համոզված է պատգամավորը։